Væri ekki skynsamlegra að banna glerílát utan skemmtistaðanna?

Hefði haldið að það væri happadrýgra að viðhalda banni við að fara með drykki út af stöðunum í glerílátum (glösum). Held að þetta bjóði hættunni heim að menn fari að byrla einhverri ólyfjan í drykki hjá fólki eða að fólk fari að sturta í sig eins og forðum. Eins þá mundu plast ílát draga kannski aðeins úr þeim glerbrotum sem einkenna miðbæinn eftir föstu- og laugardagskvöld.

Eins þá finnst mér að fólk eigi að fara að taka sig saman og lesa yfir þeim vinum sínum sem eru að beita ofbeldi í miðbænum? Í dag heyrðist af því að ráðist hefði verið á Eið Smára í miðbænum um helgina og bætist það við allt ofbeldið sem þegar höfðu komið fréttir af frá helginni.

www.ruv.is  

Fyrst birt: 31.07.2007 15:52

Síðast uppfært: 31.07.2007 15:53

Ráðist á Eið Smára í miðbænum

Eiður Smári Guðjohnsen, leikmaður Barcelona, varð fyrir fólskulegri árás í miðborg Reykjavíkur um helgina.

Samkvæmt upplýsingum frá Eggerti Skúlasyni, talsmanni Eiðs Smára, kallaði ókunnugur maður til Eiðs þar sem hann var á gangi ásamt félögum sínum nálægt Lækjartorgi. Eiður þekkti manninn ekki og svaraði því ekki kallinu. Maðurinn veittust þá að Eiði og hrinti í jörðina. Félagi mannsins kom þá aðvífandi og kýldi Eið Smára í andlitið.

Eiður er ómeiddur eftir árásina og verða engir eftirmálar að hans hálfu, að sögn Eggerts.

 Mér dettur í hug að fólk geti neitað að fara út að skemmta sér með fólki sem er að beita ofbeldi þar til að það hefur gert eitthvað í sínum málum.

Mér finnst með öllu óþolandi að saklaust fólk geti ekki lengur verið óhult að skemmta sér í bænum án þess að eiga yfir höfði sér að verða fyrir árásum bara af því að það er statt í bænum. Ég get ekki skilið að það geti verið gaman að fara í bæinn vitandi að maður er líklegur til að ráðast á aðra. Ég held að fólk sem er þannig komið fyrir ætti að hætta drekka/dópa hið snarasta áður en það veldur einhverjum óbætanlegum skaða/ miska.

Bannað að taka drykki með sér út af veitingastöðum