"Fjármálafyrirtækin borga ekki skattinn"

Þetta er nú það sem ég var að velta fyrir mér um daginn hér á blogginu. Var að lesa heimasíðu Kristins H Gunnarssonar og þar er ný færsla þar sem segir m.a.

Þrjú dæmi vil ég draga fram til þess að færa rök fyrir efasemdunum. Það fyrsta er stórgróðafyrirtækið FL Group hf. Methagnaður varð á rekstri fyrirtækisins á síðasta ári eða 44.559 milljónir króna. Reiknaður 18% tekjuskattur er 7.547 milljónir króna sem er vissulega væn summa í kassann, en þegar að er gáð í ársreikningunum kemur í ljós að ríkið fær ekkert, öllum skattinum er frestað. Fyrirtæki geta nefnilega frestað skattgreiðslum með nýjum fjárfestingum.

Annað dæmið er Straumur Burðarás Fjárfestingarbanki. Fréttablaðið greinir frá því á laugardaginn að fyrirtækið hafi frestað 10 milljarða króna skattgreiðslu með því að fjárfesta í dótturfyrirtæki sínu.

Loks nefni í Eyri hf. fjárfestingarfélag. Hagnaður þess skv. ársreikningi 2006 varð 1.994 milljónir króna. Af honum ætti fyrirtækið að greiða 330 milljónir í skatt til ríkisins, en skattgreiðslunni allri er frestað, þannið að sameiginlegur sjóður landsmanna fær á þessu ári ekki eyri frá Eyri hf. fjárfestingarfélagi frekar en frá FL Group hf. eða Straumi Burðarási.

Hluthafarnir fá hins vegar eitthvað fyrir sinn snúð og þannig sýnist mér að hluthafar í FL Group hf. fái greitt um 34% af hagnaðinum eða 15 þúsund milljónir króna. Hluthafar í Eyri hf. fá 10% eða um 200 milljónir króna.

Það virðist ekki vera nóg að hafa þessar rúmu heimildir til þess að fresta því að greiða reiknaðan tekjuskatt af hagnaði fjárfestingarfélaganna heldur virðast eigendurnir leita frekari leiða til þess að koma sér hjá því að taka þátt í sameiginlegum kostnaði þjóðarinnar, eins og rekstri heilbrigðis- og menntakerfisins.

Mér var nýlega á það bent að svo virtist sem þróunin væri sú að eignarhald á hlutabréfunum væri fært í sérstakt hlutafélag. Það væri síðan í eigu dótturfélaga sem væru skrásett í Hollandi. Þótt tekjuskattur fyrirtækja það sé verulega hærri en hér á landi þá væri hagnaður af sölu hlutabréfa skattfrjáls. Stóru hagnaðartölurnar koma af sölu hlutabréfa fremur en rekstri fyrirtækjanna og er væntanlega talinn fram í Hollandi. Aðilar sem þetta munu stunda eru nefndir FL Group og Bakkabræður.

Ef þetta reynist vera rétt þá blasir við sú mynd að skattur af rekstrinum er talinn fram á Íslandi en ekki greiddur og hagnaður af sölu hlutabréfanna er talinn fram í Hollandi og enginn skattur greiddur hvorki þar né hér.

Þá er spurningin: Eru fjárfestingarfélögin þátttakendur í íslensku samfélagi eins og venjulegir skattgreiðendur? Gleymum því ekki að aldraðir greiða skatta af lífeyrisgreiðslum sínum. Þeim skatti verður ekki frestað.

Ef þetta er rétt þá verða öll dagblöð og fréttastofur á Íslandi að setja ofan í við fréttamenn sem hafa verið að dæla í okkur fréttum að greiðslum þessara fyrirtækja í ríkissjóð.

Hlutabréf hækkuðu í Kauphöll Íslands

Athugasemdir

[Einar Sigurjón Oddsson, 5.2.2007 kl. 18:54]

Er ekki alveg eðlilegt að fyrirtæki nýti sér holur í kerfinu? Markmið þeirra er jú að græða peninga fyrir eigendurna en ekki að borga sem mest í skatt til þjóðfélagsins. 

[Bragi Einarsson, 5.2.2007 kl. 19:27]

En EIGA ekki ALLIR að greiða skatt, Einar? Mér sýnist að á þessari frétt að stórfyrirtæki komist upp með allan fjandan og í þessu tilfelli sú hreinlega BÚNAR til GLUFUR handa þeim til að "svíkja" undan skatti. 

[Magnús Helgi Björgvinsson, 5.2.2007 kl. 21:06]

Ef þetta er rétt þá er ég mest reiður yfir þeirri umræðu sem verið hefur hér í þjóðfélaginu síðustu vikur um að rétt væri að lækka tekjuskatt þeirra enn frekar því að það skilaði meiru í kassan hjá okkur. Það hefur þá einhver verið að ljúga um þær upphæðir sem þeir greiða í skatt. Það er mundur á hvað menn eiga að borga og svo hvað þeir borga í skatt. Ef hægt er að nota svona skattafiff, þá verður bara að loka fyrir það. Og láta fyrirtækin borga af hagnaði við sölu strax.

[Fannar frá Rifi, 5.2.2007 kl. 21:26]

Ef þetta reynist rétt þá verð ég að vera sammála þér. Fyrirtæki eru partur af samfélaginu og eiga að taka þátt í því og borga sinn hluta. Fyrirtækin ættu að sjá sér þá skildu að vera ábyrg gagnvart samfélaginu. Ef þetta er eins og hér að ofan stendur þá myndi ég telja þetta vera svik undan skatti. Nú skulum við bíða eftir að fréttamenn taki við sér og kanni þessi mál til hlítar og gangi á eftir þessum fyrirtækjum. Gaman verður að heyra hvernig baugsmiðlarnir munu taka á málum sem tengjast eigendum þeirra.