Ritstjóri Viðskiptablaðsins um tillögur framsóknarmanna! Og annarra!

Leiðari Viðskiptablaðsins:

Þjóðnýting skulda

Tillögur Framsóknarflokksins ganga út á að þeir sem skulda mest og eiga verðmætustu eignirnar fái mest.

Það er fullkomlega ábyrgðarlaust að sjá ekki í gegnum kosningaloforð Framsóknarflokksins um almenna „skuldaleiðréttingu“ á húsnæðislánum. Í fyrsta lagi er ekkert fast í hendi varðandi ímyndaðan hagnað ríkissjóðs gangi nauðasamningar við kröfuhafa gömlu bankanna eftir. Í öðru lagi, ef hagstæðir samningar nást, er það forgangsatriði að greiða niður skuldir ríkissjóðs þannig að allir landsmenn og framtíðarkynslóðir njóti ávinningsins.

Tillögur Framsóknarflokksins ganga út á það að þeir sem skulda mest, og eiga verðmætustu eignirnar, fái mest í sinn hlut við lækkun skulda. Það er jafnvel fólk sem er ekki í greiðsluvandræðum þótt eiginfjárstaðan sé neikvæð. Fyrir þennan hóp fólks er farsælast, eins og fyrir alla landsmenn, að hagvöxtur hér aukist með almennum aðgerðum ríkisvaldsins þannig að verðmætasköpun aukist. Það er ekkert réttlæti fólgið í því að eignafólk fái stærstan hluta af takmörkuðu fé ríkissjóðs í sinn hlut til að lækka skuldir sínar. Almenn „skuldaleiðrétting“ tekur ekki á vanda þeirra sem verst standa.

Tillögur Framsóknarflokksins munu þar af leiðandi ýta undir skuldasöfnun ríkissjóðs og auka á verðbólgu. Það myndi koma sér illa fyrir þá sem annaðhvort eiga ekki neitt eða skulda ekki neitt. Þá má aldrei gleyma því að núverandi ráðamenn í dag bera líka ábyrgð á framtíðinni með ákvörðunum sínum. Það er óábyrgt og óásættanlegt að frambjóðendur kaupi sér stuðning til þingsetu á kostnað framtíðarinnar. Þegar þetta er sett í samhengi við skuldir hins opinbera, ríkis og sveitarfélaga, ábyrgð á Íbúðalánasjóði og lífeyrissjóðum opinberra starfsmanna er varla hægt að fjötra komandi kynslóðir í frekari skuldaklafa. Í Viðskiptablaðinu í dag kemur fram að heildarskuldir ríkissjóðs í byrjun þessa árs námu tæpum tvö þúsund milljörðum króna sem er um 119% af vergri landsframleiðslu.

Í byrjun árs 2008 námu skuldir ríkisins til samanburðar um 570 milljörðum króna eða 39% af landsframleiðslu. Samkvæmt fjárlögum þessa árs er gert ráð fyrir að vaxtagreiðslur ríkisins nemi um 88 milljörðum króna sem mætti nota til að reka Háskóla Íslands í tæp sex ár.

Þá kemur fram í Viðskiptablaðinu að heildarskuldir og skuldbindingar sveitarfélaga nemi um 261 milljarði króna. Óuppfyllt fjárþörf íslenskra sveitarfélaga fyrir árið 2013 nemur tæpum 4,7 milljörðum króna. Til að mæta því gati verður að hækka skatta og gjöld eða hætta við fjárfestingar sem annars þarf að ráðast í til að viðhalda innviðum í rekstri sveitarfélaga.

Þetta kerfi er ekki lengur sjálfbært og það verður að stöðva frekari skuldasöfnun og hefja niðurgreiðslu lána. Þetta þekkja allir sem reka heimili og rekstur hins opinbera er ekki mikið frábrugðinn nema stjórnmálamenn geta tekið sér það vald að taka peninga af fólki með valdi gangi reikningsdæmið ekki upp. Og það er auðvelt að eyða peningum sem er ekki sjálfsaflafé til að auka við fylgi sitt. Þess vegna er ábyrgðarlaust að styðja við þær hugmyndir sem Framsóknarflokkurinn hefur sett fram fyrir þessar kosningar.

Bæði Katrín Júlíusdóttir og Katrín Jakobsdóttir hafa talað með ábyrgari hætti um lækkun skulda ríkissjóðs og átta sig á þeirri stöðu sem ríkissjóður er kominn í. Vissulega eru leiðir og áherslur ólíkar á milli flokka en þó er virðingarvert að þær átti sig á samhengi hlutanna. Það hafa frambjóðendur Sjálfstæðisflokksins einnig gert og eru með ábyrgar tillögur þegar kemur að ríkisfjármálum og lækkun skulda. Það á ekki að refsa þeim framboðum sem leggja fram skýra stefnu. Stefna Framsóknarflokksins byggir á skýjaborgum sem blása verður á fyrir kjördag. Það á ekki að þjóðnýta einkaskuldir.