Það væri gaman að kynna sér hver var að ljúga að okkur þegar Síminn var seldur.

Ég man það þegar sala á símanum stóð yfir. Þá var fullyrt á alþingi af Samgönguráðherra og fleirum að grunnnetið væri ekki hægt að skilgreina og halda frá við sölunna. Maður gæti farið í þingræður og séð hvað ráðherra sagði og þá er náttúrulega staðfest að hann var að ljúga að okkur.

Egill Helgason segir um þetta mál:

Vísir, 21. mar. 2007 12:16

 

Míla heitir fyrirtæki sem hefur verið stofnað um rekstur grunnets Símans. Hefði kannski verið nær að láta það heita Kílómeter - mílur eru okkur Íslendingum framandi. Þetta er hið sama grunnet og ómögulegt var að skilja frá Símanum þegar hann var seldur. Maður skyldi varast að trúa öllu sem sagt er í pólitíkinni.

Aðskilnaðurinn er náttúrlega klassísk viðskiptabrella til að láta afkomutölur Símans - dýrasta símafyrirtækis í heimi - líta betur út. Kaupendur fyrirtækisins töldu sig hafa vilyrði fyrir því að Orkuveita Reykjavíkur keypti grunnnetið - en sú von gufaði upp þegar Guðlaugur Þór Þórðarson tók við stjórnarformennsku í Orkuveitunni. Því sitja þeir uppi með þessa starfsemi sem fylgja kvaðir um að halda uppi fjarskiptaþjónustu um allt land. En einokunin er sú sama og áður - við höfum fundið fyrir því hér á Stöð 2 að taxtarnir eru núorðið svo háir svo háir að við getum varla látið okkur dreyma um að hafa mann í mynd frá Akureyri.

Frétt af mbl.is

  Fyrirtækið Míla stofnað um fjarskiptanet Símans
Viðskipti | mbl.is | 20.3.2007 | 15:51
Míla er nafn nýs fyrirtækis sem stofnað hefur verið um rekstur, uppbyggingu og viðhald fjarskiptanets Símans. Míla hefur formlega rekstur hinn 1. apríl næstkomandi en stofnun fyrirtækisins var samþykkt á aðalfundi Símans sem haldinn var í lok síðustu viku.

Fyrirtækið Míla stofnað um fjarskiptanet Símans