Fólk hefur verið að tala um aðgerðaleysi stjórnvalda og mistök!

En hefur fólk skoðað það sem hefur þó verið gert? Ég viðurkenni að atriði eins og að seðlabankastjóri fari frá er enn ófrágengið. En hvað hefur verið gert síðan fyrstu vikuna í október:

• Bankastarfsemi hefur verið haldið gangandi. Þannig að fólk fékk launin sín og gat stundað öll almenn viðskipti hér á landi.
• Fjármálastofnunum hefur verið upp á lagt að koma til móts við skuldara og lán eru ýmist fryst eða aðlöguð eins og hægt er að greiðslugetu.
• Bankastjórar voru látnir fjúka strax eða fljótlega.
• Lykilstjórnendur eru nú að hætta hver á eftir öðrum.
• Unnið var nákvæm áætlun til að leggja fyrir IMF og kjölfarið fékkst fyrirgreiðsla frá þeim.
• Samið var við ESB varðandi IceSave og í kjölfarið fengust lánalínur hjá ýmsum löndum.
• Félags- og tryggingarmálaráðherra hefur breytt mörgum atriðum til að koma til móts við þá sem lakast standa.
• Ríkisskattstjóri hefur hafið rannsókn á einkahlutafélögum og slóð þeirra víða um lönd
• Skipuð hefur verið nefnd til að rannsaka aðdraganda að þessu hruni.
• Verið er að leita að sérstökum saksóknara til að rannsaka þau mál í þessu hruni sem kunna að vera saknæm.
• Tekist hefur að koma í veg fyrir algjöra árás erlendra lánveitenda sem standa núna með útistandandi kröfur á gömlubankanna
• Verið er að styrkja Kaupþing í málferlum við Bresku stjórnina.
• Verið að huga að því að kæra Breta fyrir mannréttindadómstól
• Sögur um skulda niðurfellingar hafa sem betur fer ekki reynst eins rosalegar og af hefur verið látið.
• Samfylkingin búin að leggja spilin á borðið þannig að ef að Sjálfstæðismenn vilja ekki aðildarviðræður við ESB þá sé samstarfi þessara flokka sjálf hætt.
• Á eftir að bæta fleiri atriðum á þennan lista.

Ég verð að segja að þetta er nú bara þó nokkuð. Og mjög margt af þeim atriðum sem gagnrýnendum hafa haldið á lofti sem nauðsynlegum.

Atriði sem en á eftir að gera eru m.a.

• Skapa landinu nýja framtíðarsýn
• Endurnýja umboð stjórnmálamanna í kosningum
• Sækja þá til saka sem hafa brotið lög
• Setja ný lög og reglugerðir til að draga úr líkum á að svona komi fyrir aftur
• Og í kjölfar rannsókna láta þá víkja sem rannsókn sýnir að hafa ekki staðið sig í sínum hlutverkum t.d. hjá ríkisstofnunum og ráðuneytum.
• Og síðast enn ekki síst að auka upplýsingastreymi til fólks. Það duga ekki illa uppfærðar heimasíður heldur á að vera þáttur í ljósvökunum þar sem á mannamáli er farið yfir það sem á að gera og það sem er búið. Svona þáttur ætti að vera jafnvel 4 til 5x í viku.

Að kosningum loknum mæli ég með vinstri stjórn.  Þar sem að þeim er betur treystandi til að hafa hag fólksins að leyðarljósi.

Leita til mannréttindadómstóls

Athugasemdir

[Jón Ragnar Björnsson, 6.1.2009 kl. 14:33]

Takk fyrir listann. Hann er góð beinagrind.

Ég staldraði við „Skapa landinu nýja framtíðarsýn“ og „Endurnýja umboð stjórnmálamanna í kosningum“. Hefði frekar viljað kalla það: Veita stjórnmálamönnum umboð í kosningum. Við sköpum ekki framtíðarsýn með þeim stjórnmálamönnum, sem nú sitja. Það er lífsnauðsynlegt fyrir þjóðina að fá mikið nýtt blóð inn í stjórnmálin.

Við (þú, ég og allir hinir) þurfum að ákveða okkar framtíðarsýn, svo látum við stjórnmálamenn um að framkvæma vilja okkar -með aðhaldi. Þeir eiga ekki að ákveða fyrir okkur.

Veit ég vel að við höfum ekki öll sömu framtíðarsýnina (sem betur fer). Við verðum að nota næstu vikur og fáu mánuði til að móta okkar sýn á framtíðina, finna málamiðlun, svo flestir geti sætt sig við.

Alla vega: Burt með spillingu, sökudólgar verði meðhöndlaðir eins og í eðlilegu réttarríki, burt með klíkur og sérhagsmunahópa.