Verði ykkur að góðu Reykjavíkurbúar: Leikskólagjöld hækka um áramót

Sé ekki alveg að almennar verðlagshækkanir kalli á þessa hækkun. En einhvernveginn fannst mér að Sjálfstæðisflokkurinn og örflokkurinn sem þeim fylgir hafi lofað allt öðru síðasta vor.

 

Fyrst birt: 23.12.2006 19:04

Síðast uppfært: 23.12.2006 21:29

Rvk: Leikskólagjöld hækka um áramót

Leikskólagjöld í Reykjavík munu hækka um tæp 9% um áramótin. Þorbjörg Helga Vigfúsdóttir, formaður Leikskólaráðs, segir hækkunina koma til vegna almennra verðlagshækkana.

Mikið var rætt um lækkun leikskólagjalda fyrir borgarstjórnarkosningarnar í vor. Eftir að nýr meirihluti komst til valda voru gjöldin lækkuð um 25% frá og með 1. september sl. En nú hafa gjöldin hækkað aftur um 8,8%. Þorbjörg Helga bendir einnig á að laun leikskólastarfsfólks hafi hækkað um 16-20% á þessu ári og hluti hækkunarinnar nú komi til vegna þess. Fyrir lækkunina í september voru hjón með tvö börn að borga tæpar 40.000 krónur á mánuði í leikskólagjöld fyrir átta klukkustunda vistun fyrir tvö börn.

Athugasemdir

[TómasHa, 26.12.2006 kl. 00:52]

Ef menn lesa þess frétt þá lækkuðu þau fyrst um 25% og hækka svo um 8,8%.  Eigum við ekki að vera réttláttir og viðurkenna heildar lækkun?

[Magnús Helgi Björgvinsson, 26.12.2006 kl. 01:00]

En hvurslags loforð um lækkanir eru það að lækka gjöldin um 25% og fara svo 6 mánuðum síðar að hækka þau? Er það þá sem búast má við að öll loforð sem gefin eru í kosningum glildi þá fyrsta korterið eftir að viðkomandi flokkur hefur náð völdum. Einnig er rétt að nefna þá hugmynd sem þessir flokkar komu með um að hækka þjónustugjöld félagsþjónustu Reykjavík við öryrkja og fatlaða. Þar átti að hækka gjöld fyrir að aðstoða við þrif og hreinlækti um 10% hjá fólki sem er algjörlega háð aðstoð. Ég held því fram að innan árs verði leikskólagjöld í Reykjavík orðin hærri en þau voru fyrir kosningar.

[TómasHa, 26.12.2006 kl. 01:15]

Ég er bara að benda á það að að hafa þetta réttan málflutning og halda því til haga að gjöldin hafa í heildina lækkað.

Það getur vel verið að þú haldir að þau verði hærri, en staðan sem er núna er sú að þau hafa lækkað og það talsvert.