Góð ádrepa á spilakassastríð Vilhjálms

 

Jón Kaldal skrifar í Fréttablaðinu í dag góðan pistil um þessi læti sem Vilhjálmur Þ Vilhjálmsson hefur verði með gegn spilakössum í Mjóddinni. Hann bendi nú á að þessir kassar eru nú víða þar sem fjölskyldur leggja leið sína. Og því verður þessi barátta hans dálítið svona furðuleg sbr þennan kafla úr pistli Jóns Kaldals:

Fréttablaðið, 06. jan. 2007 06:00

Skinhelgi borgarstjóra

Vilhjálmur Þ. Vilhjálmsson borgarstjóri er lagður upp í vægast sagt undarlega vegferð gegn því að salur með spilakössum verði opnaður í verslunarmiðstöðinni Mjódd. Meginrök borgarstjóra gegn því framtaki eru að borgaryfirvöld vilji ekki starfsemi slíkra "ógæfukassa" í fjölskylduvænum hverfum.

Af því tilefni er rétt að spyrja hvort Vilhjálmur viti ekki að nú þegar eru reknir salir með spilakössum víða um borgina, og það í hverfum sem hingað til hafa ekki talist fjandsamlegri fjölskyldum en önnur hverfi?
Ef sú er raunin, þá má borgarstjóri taka hinn nýja og að því er virðist röggsama lögreglustjóra höfuðborgarsvæðisins, Stefán Eiríksson, sér til fyrirmyndar og fá sér göngutúr um borgina sína.

Í miðbænum getur Vilhjálmur til dæmis brugðið sér inn á að minnsta kosti fimm staði og sett pening í kassa á vegum Happdrættis Háskóla Íslands, við Skólavörðustíg, í Aðalstræti og við Laugaveg. Og tæplega hafa íbúar miðbæjarins kosið að setjast þar að vegna þess að hverfið sé ekki fjölskylduvænt, að minnsta kosti ekki sá sem hér skrifar.

Og þegar Vilhjálmur er búinn með miðbæjarrúntinn getur hann haldið sem leið liggur í austur, komið við í Kringlunni og látið reyna á heppnina í kössum HHÍ sem þar eru. Ef lánið er ekki með borgarstjóra getur hann fært sig yfir í Glæsibæ í Laugardal og athugað hvort betur gangi í kössunum þar, og í leiðinni spurt íbúa í Álfheimum hvort þeir telji sig ekki búa í fjölskylduvænu hverfi.

Við þetta má bæta að í Smáralind í Kópavogi eru slíkir kassar. Ég man bara ekki hvernig þetta er í Kringlunni en minnir að þeir hafi þó verið á svæðinu í kring um Kringlukránna.

 

Athugasemdir

[Óttarr Makuch, 7.1.2007 kl. 14:31]

Villi hefur ekki verið borgarstjóri Reykjavíkur nema í u.þ.b. 6 mánuði eða svo.  Hann hefur áður talað um spilakassa "menningu" í borgarstjórn og borgarráði svo þessi umræða hjá honum er alls ekki ný á nálinni það hefði Jón Kaldal kannski átt að kynna sér áður en hann ritaði greinina.  Villi er þarna að fara fyrir hönd umboðsmanna sinna þe kjósenda í hverfinu sem eru að stærstum hluta mjög á móti opnun spilasalar í Mjódd, það erum u.þ.b 3000 Breiðhyltingar búnir að skrifa undir mótmælaskjal og ýmis félagasamtök hafa lagst gegn opnunni einnig með alla sínar fylkingar á bakvið sig.  Þannig má ætla að almenningur "ætlist" til þess og vonist eftir því að borgarstjórinn stigi fram og komi í veg fyrir þessa opnun á spilavíti í mjódd !