Framsókn talar tungum tveim

Gat nú verið að yfirlýsingar Jónínu Bjarmarz um eignarnámið væri talaðr niður af formanninum daginn eftir.

Fréttablaðið, 24. feb. 2007 08:00

Útiloka ekki eignarnám

Jón Sigurðsson, iðnaðar- og viðskiptaráðherra, getur ekki tjáð sig um hugsanlegt eignarnám jarða við Þjórsá né um ummæli Jónínu Bjartmarz umhverfisráðherra í þá veru að slík valdbeiting sé „fráleit".

„Ég má ekki úttala mig um þetta mál, því samkvæmt stjórnsýslunni verður ráðherra að bíða ef málið kemur til hans á seinna stigi, þá má hann ekki vera vanhæfur [til að úrskurða]." Jón tekur þó fram að það sé „hvergi neins staðar á neinu borði að fara út í neitt eignarnámsferli, það er þvert á móti verið að semja í góðu".

Arnar Þór Sævarsson, aðstoðarmaður Jóns, tekur fram að þrjú skilyrði þurfi til eignarnáms: Að almannahagsmunir krefjist þess, að lagaheimild liggi fyrir því og að fullar bætur verði greiddar landeigendum. Ljóst sé að heimild finnist í lögum til eignarnáms. Málið snúist því fyrst og fremst um hvort almannahagsmunir séu nægilega knýjandi eða ekki.
Árni M. Mathiesen fjármálaráðherra vildi heldur ekki tjá sig um málið, en benti á sín fyrri ummæli í Fréttablaðinu. Hinn 20. janúar sagði Árni eftirfarandi:

„Lögin leyfa eignarnám og því er það í prinsippinu réttlætanlegt, en auðvitað getur það verið misjafnt eftir einstökum tilfellum. [...] Ég veit hins vegar ekki hvernig þetta mál stendur eða hverjar aðstæður eru í einstökum málum, þannig að ég get ekki svarað fyrir einstök mál."

Þetta má nú færa í ljóð sem gæti byrjað svona:

Framsókn hefur tungur tvær
trúa þeim nú fáir
Eitt í dag og annað í gær
En uppsker svo eins og hann sáir.

Athugasemdir

[Pétur Gunnarsson, 24.2.2007 kl. 11:55]

Nú finnst mér þú ekki mjög sanngjarn, kæri bloggvinur, manstu eftir því fyrir síðustu kosningar þegar Jón Kristjánsson gerðist settur umhverfisráðherra vegna Norðlingaöldu af því að Siv hafði tjáð sig um málið og gert sig þannig vanhæfa? Ég held að Jón sé að reyna að forðast það, en kannski spurning hversu klókt það er hjá honum ekki nema rúmum tveimur og hálfum mánuðum fyrir kosningar.

[Magnús Helgi Björgvinsson, 24.2.2007 kl. 12:20]

Jú kannski var ég full fljótur að dæma hann en mér heyrðist í gær þegar ég hlustaði á hann að hann væri ekki afhuga eignarnámi. Og eins finnst mér að þessi réttur sem Landsvirkjun hefur til að fara fram á eignarnám sé eitthvað sem Jón ætti að breyta.