Ekki mikið að marka Indefence!

Nú eru þeir sjálfsagt ánægðir. Búnir að búa til sögur um skipulagða skemmdarstarfsemi á listanum sínum. Sem átti að vera stjórnað og framkvæmd úr Stjórnaráði, RUV, Hagstofunni og Fréttablaðinu. Nú svo kemur í ljós að það er einn blaðamaður á Fréttablaðinu sem var að prófa hvort að hvaða bulltölu sem er væri hægt að nota. 3 til 4 færslur frá RUV og nokkrar frá stjórnarráði og Hagstofu.

Síðan í kvöld þá benti fulltrúi þeirra á  í Kastljósi að þeir væru ekki á móti því að greiða af Icesave. Ég hugsaði nú? Ég hafði heyrt eitthvað annað í sumar. Og þeir reikna með að ef að icesave ábyrgðin nú verði feld niður þá gildi sú sem samið var um 28. ágúst. En daginn fyrir það sögðu þeir:Áskorun til alþingismanna 27. ágúst 2009: Samþykkið ekki icesave samninginn

Þeir hafa gefið fólki fyllilega í skyn að það sé að hafna Icesave skuldbindingum og að við þurfum ekkert að borga.

Nú og svo rakst ég á þetta áðan hjá Gunnari Axel Axelsyni í Hafnarfirði. Foreldrar hans sem aldrei hafa skrifað undir fengu eftirfarandi póst:

Kæri áskorandi.

Undirskriftarsöfnunin gengur ótrúlega vel. Á aðeins rúmri viku hafa 24.000 karlar og konur skorað á forseta Íslands að synja nýjum Icesave lögum staðfestingar og standa þannig vörð um hina mikilvægu fyrirvara sem Alþingi samþykkti í sumarlok.

Ef hvert og eitt okkar nær einum áskoranda til viðbótar í hópinn þá tvöföldum við fjöldann. Svo einfalt er það.

Gætir þú fundið 1-2 karla eða konur sem hefðu áhuga á því að gerast áskorendur?

Umræður á vinnustað skila sér vel. Jafnvel stutt og einföld ábending til fólks um að fara inn á http://indefence.is/ til að kynna sér áskorunina og skrifa undir getur skilað sér í mörgum undirskriftum.

Einnig er mikilvægt að senda vinum og ættingjum tölvupóst, hvetja vini á facebook, í skólanum,  saumaklúbbi eða í heita pottinum. Nefnið alltaf heimsíðuna - http://indefence.is - og hringið einnig í eldra fólk, sem hefur síður aðgang að tölvu.

Ef allir leggja verkefninu lið munum við með þessum einfalda hætti styrkja verulega stoðir áskorunarinnar til forsetans. Það er eftir henni tekið hér á landi - í öllum stjórnmálaflokkum - og erlendis styrkir hún samningsstöðu okkar.

Við skulum hvetja alla til að taka þátt í átakinu á http://indefence.is/

Kveðja,

InDefence hópurinn

 

RÚV telur ekki tilefni til aðgerða

Athugasemdir

[Jóhannes Þ. Skúlason (IP-tala skráð) 16.12.2009 kl. 10:52]

Magnús minn, mikið þætti mér vænt um ef þú hættir að rangfæra það sem við höfum sagt og gert í þessari Icesave umræðu.

 Það rétta hér er að InDefence hópurinn hefur alla tíð frá 5. júní haft mjög einfaldan málstað, sem hefur komið margítrekað fram, bæði í efni sem við höfum sent frá okkur og í fjölmiðlaviðtölum.

Sá málstaður er: Íslendingar geta ekki skorast undan ábyrgð í Icesave málinu. Við þurfum sanngjarna og framkvæmanlega lausn á Icesave deilunni, lausn sem við getum staðið við efnahagslega til framtíðar og felur ekki í sér gríðarlega efnahagslega áhættu.  

Við höfum mótmælt þessum samningum sem liggja á borðinu á þessum forsendum, þ.e. að Íslenidngar þurfi betri samning til að geta staðið við greiðslu á því sem við berum ábyrgð á.  

Til þess að komast að því að ég er að segja þér satt þarftu aðeins að lesa það sem frá okkur hefur komið síðan í júní. Jafnvel í fréttatilkynningunni sem þú linkar sjálfur í hér að ofan stendur einmitt: "Íslendingar vilja sanngjarna og framkvæmanlega lausn á Icesave deilunni. Alþjóðasamfélagið er að vakna til vitundar um að þeir lánasamningar sem nú liggja á borðinu eru hvorki sanngjarnir né framkvæmanlegir."

Það sem ég sagði í Kastljósi í gær var nákvæmlega það sama og ég (og hópurinn í heild) hef verið að segja síðan í júní. Þú heldur því fram að þú hafir heyrt eitthvað annað í sumar. Þú hefur þá bara verið að hlusta á einhverja aðra en InDefence, því við höfum aldrei, ég endurtek:ALDREI haldið því fram að Íslendingar eigi ekki að standa við það sem þeir bera ábyrgð á.  Við höfum barist gegn þessum samningi á forsendum samningsins, ekki ábyrgðarinnar. 

Ég vona að þetta sé skýrt héðan í frá og þú hættir að leggja mér orð í munn.

[Ingibjörg Hinriksdóttir, 16.12.2009 kl. 21:04]

Því miður missti ég alla trú á InDefence hópum þegar einn forsvarsmanna hans gerðist formaður í öðrum af þeim stjórnmálaflokkum sem mesta ábyrgð bera á efnahagshruninu. Sú trú verður ekki endurvakin fyrr en ég fæ fyrir því fullkomna vissu að þarna séu ekki stjórnmálaöfl að véla um áróður. Svo vildi ég líka gjarnan vita hverjir það eru sem fjármagna samtökin!