Auðmenn koma til með að losna við RUV nefskattinn

Var að lesa frétt á visir.is að til að nýja frumvarpið um RUV gerir ráð fyrir að þeir sem hafa eingöngu tekjur í formi fjármagnstekna koma ekki til með að borga nefskattinn fyrirhugaða sem á að taka upp í tengslum við oHf væðingu RUV. Það er nú ekki hægt að láta þá borga of mikið. Þeir gætu flutt úr landi.

Fréttablaðið, 21. jan. 2007 05:15

Auðmenn borga ekki nefskatt

Fólk sem eingöngu hefur fjármagnstekjur verður undanþegið nefskattinum sem greiddur verður til Ríkisútvarpsins, samkvæmt frumvarpi menntamálaráðherra um RÚV ohf. Í því er aðeins gert ráð fyrir að greiðendur tekjuskatts borgi nefskattinn.
Um 2.200 manns töldu aðeins fram fjármagnstekjur samkvæmt skattskrám frá síðastliðnum ágústmánuði.
Jóhanna Sigurðardóttir Samfylkingunni benti á þetta í umræðum um Ríkisútvarpsfrumvarpið og hefur staðfestingu nefndasviðs Alþingis á þessum skilningi. „Mér finnst þetta skelfilega óréttlátt. Enn einu sinni er verið að ýta undir ójöfnuðinn í samfélaginu og hygla auðmönnum," segir Jóhanna og bendir á að hinir sömu 2.200 séu einnig undanþegnir greiðslum í Framkvæmdasjóð aldraðra sem nema um sex þúsund krónum á ári.
Miðað er við að nefskatturinn verði rúmar 14.500 krónur á ári. Samtals eru þetta því um 20 þúsund krónur á ári.
Skattleysismörk eru um 90 þúsund krónur og segir Jóhanna að þeir sem hafi örlítið hærri tekjur, til dæmis 95 þúsund á mánuði, þurfi að greiða RÚV-skattinn sem og í Framkvæmdasjóðinn af fullu. Í þessu felist fullkomið óréttlæti. „Fyrir þetta þarf Þorgerður Katrín Gunnarsdóttir menntamálaráðherra að svara áður en umræðum lýkur," segir Jóhanna.