Þetta er nú bara ekki nóg!

Heyrði viðtal við Gissur forstjóra Vinnumálastofnunar sem taldi það til marks um aukið aðhald þeirra að þeir væru nú búnir að fara fram á fjárnám í einu fyrirtæki þar sem það greiddi ekki dagsektir. Fram kom hjá honum að þetta fyrirtæki væri með yfir 70 starfsmenn í vinnu og hugsanlegt að þeir væru leigðir þaðan til annarra fyrirtækja. Þá kom fram í frétt ruv að hópur þessara 1700 óskráðu verkamanna væru að fá laun sambærileg við laun í Lettlandi sem væru um 30. 000 kr á mánuði. Eins þá búa starfsmenn við afleitar aðstæður oft á tíðum.

Úr frétt á www.ruv.is

Sumir hafa unnið hér mánuðum eða misserum saman og þegið fyrir laun eins og þau tíðkast í Litháen eða öðrum löndum Austurevrópu, kringum þrjátíu þúsund, fullyrða talsmenn verkalýðshreyfingarinnar. Aðrir starfa á strípuðum taxta eða þiggja liðléttingakaup og búa við næsta frumstæðar aðstæður.

Af hverju eru þessi fyrirtæki bara ekki stöðvuð strax. Þau hafa ekki leyfi til að vera með starfsfólk í vinnu sem ekki hefur kennitölu og borgar því ekki skatt af sínum launum. Það á ekki að beita neinum vettlingatökum heldur stöðva þau strax þar til að þau hafi komið þessum málum í lag.

Ætlum við að láta það spyrjast út um okkur að við séum að verða gróðrastýja fyrir nútíma þrælahald?

Eftirlitsátak vegna erlendra starfsmanna hafið